 رابطہ عالم اسلامی کے سیکرٹری جنرل کی زیرِ صدارت شمالی وجنوبی امریکہ کی اسلامی قیادتوں کی کونسل کا تیسرا اجلاس
واشنگٹن:
رابطہ عالم اسلامی کے سیکرٹری جنرل اور چیئرمین مسلم علماء کونسل، عزت مآب شیخ ڈاکٹر محمد بن عبدالکریم العیسی نے امریکی دارالحکومت واشنگٹن میں شمالی و جنوبی امریکہ کی اسلامی قیادتوں کی کونسل کے تیسرے اجلاس کی صدارت کی۔ یہ کونسل مارچ 2022 میں واشنگٹن میں منعقدہ اپنے تاسیسی اجلاس کے بعد 'میثاقِ مکہ مکرمہ' کے اصولوں کی روشنی میں قائم کی گئی تھی۔ اس اجلاس میں امریکہ کے شمالی وجنوبی خطوں سے تعلق رکھنے والی اسلامی قیادتوں کے علاوہ اختتامی نشست میں امریکی حکومتی شخصیات، قانون سازوں اور مختلف مذاہب و ثقافتوں کی نمائندہ قیادتوں نے بھی شرکت کی تھی۔
تاسیسی کانفرنس کے شرکاء نے اس موقع پر شیخ ڈاکٹر محمد العیسی کو کونسل کا صدر منتخب کیا تھا، کیونکہ اس کونسل کی فکری بنیاد 'میثاقِ مکہ مکرمہ' پر رکھی گئی تھی، نیز اس کے قیام کی دعوت بھی انہی کی جانب سے دی گئی تھی ،مزید برآں، انہیں مخلف حلقوں کے درمیان ایک متفقہ اور جامع شخصیت کے طور پر دیکھا جاتاہے۔ اس تناظر میں امریکہ سے باہر کی بااثر اسلامی شخصیات کو بھی کونسل میں شامل کیا گیا، جیسا کہ دنیا بھر کے مشابہ مراکز، مجالس اور اداروں میں ہوتا ہے۔
اجلاس کے دوران صدر اور اراکین کی جانب سے پیش کیے گئے متعدد موضوعات پر تفصیلی گفتگو ہوئی۔ ان میں مذہبی اور قومی شناخت کا موضوع بھی شامل تھا، جس پر شیخ ڈاکٹر العیسی نے واضح کیا کہ ترقی یافتہ آئینی اور قانونی نظاموں میں، جو مذہبی آزادی اور دینی خصوصیات کا احترام کرتے ہیں، مذہبی اور قومی شناخت کے درمیان کوئی تضاد نہیں پایا جاتا، بلکہ یہ تصادم انتہاپسند سوچ رکھنے والے عناصر پیدا کرتے ہیں۔
انہوں نے امریکی مسلم کمیونٹی کو سراہتے ہوئے کہا کہ اس نے خود کو انتہاپسند جماعتوں کے ایجنڈوں سے دور رکھا، جنہوں نے اسلام جیسے عظیم دین کو اپنے سیاسی مقاصد اور غلط تصورات کے دائرے میں محدود کرنے کی کوشش کی۔ انہوں نے کہا کہ امریکی مسلم کمیونٹی پورے اسلامی دائرے کے لئے باعث فخر ہے، کیونکہ اس نے دینی اعتدال، رواداری، بقائے باہمی، حکمت اور حسنِ اخلاق کی بہترین مثال پیش کی ہے، خصوصاً قانون کی پاسداری اور سماجی ہم آہنگی کے فروغ میں اس کا کردار نمایاں ہے، جس کا اظہار اس کے مختلف سماجی طبقات کے ساتھ مثبت تعلقات سے ہوتا ہے۔
اجلاس میں عمومی طور پر نفرت انگیز رویّوں اور خاص طور پر اسلاموفوبیا کے مسئلے پر بھی گفتگو ہوئی۔ شیخ ڈاکٹر العیسی نے اس موقع پر کہا کہ مہذب آئین اور قوانین نفرت پر مبنی رویّوں کی اجازت نہیں دیتے۔ انہوں نے اس امر پر خوشی کا اظہار کیا کہ مسلم کمیونٹی ہر اُس آواز، نعرے اور عمل کے خلاف مؤثر کردار ادا کر رہی ہے جو نفرت کو فروغ دیتا ہے، خواہ اس کا ہدف کوئی بھی مذہب، نسل یا طبقہ ہو۔
اجلاس کے دوران متعدد اسلامی اصطلاحات پر بھی بحث ہوئی، اور ان سے متعلق پائے جانے والے غلط تصورات کا جائزہ لیا گیا۔ اس موقع پر شیخ ڈاکٹر العیسی نے اپنے بین الاقوامی مطالعات اور سرویز کی روشنی میں مختلف اصطلاحات کی مثالیں پیش کیں، ان کے بارے میں پائی جانے والی غلط فہمیوں کی وضاحت کی، اور دینی نصوص اور تاریخی شواہد کی بنیاد پر ان کا علمی اور مستند تجزیہ پیش کرتے ہوئے بتایا کہ ان غلط تصورات کا مؤثر جواب کس طرح دیا جا سکتا ہے۔
گزشتہاگلا
اتوار, 17 May 2026 - 11:04 -
[](https://www.addtoany.com/share#url=https%3A%2F%2Fmail.themwl.org%2Fur%2Fnode%2F41492&title=%D8%B1%D8%A7%D8%A8%D8%B7%DB%81%20%D8%B9%D8%A7%D9%84%D9%85%20%D8%A7%D8%B3%D9%84%D8%A7%D9%85%DB%8C%20%DA%A9%DB%92%20%D8%B3%DB%8C%DA%A9%D8%B1%D9%B9%D8%B1%DB%8C%20%D8%AC%D9%86%D8%B1%D9%84%20%DA%A9%DB%8C%20%D8%B2%DB%8C%D8%B1%D9%90%20%D8%B5%D8%AF%D8%A7%D8%B1%D8%AA%20%D8%B4%D9%85%D8%A7%D9%84%DB%8C%20%D9%88%D8%AC%D9%86%D9%88%D8%A8%DB%8C%20%D8%A7%D9%85%D8%B1%DB%8C%DA%A9%DB%81%20%DA%A9%DB%8C%20%D8%A7%D8%B3%D9%84%D8%A7%D9%85%DB%8C%20%D9%82%DB%8C%D8%A7%D8%AF%D8%AA%D9%88%DA%BA%20%DA%A9%DB%8C%20%DA%A9%D9%88%D9%86%D8%B3%D9%84%20%DA%A9%D8%A7%20%D8%AA%DB%8C%D8%B3%D8%B1%D8%A7%20%D8%A7%D8%AC%D9%84%D8%A7%D8%B3)