رابطہ عالم اسلامی کی جانب سے مقبوضہ مغربی کنارے میں قابض حکومت کے اقدامات کو مسترد کرنے سے متعلق سعودی عرب اور عرب و اسلامی ممالک کے وزرائے خارجہ کے بیان کا خیر مقدم

مکہ مکرمہ
رابطہ عالم اسلامی نے مملکت سعودی عرب اور متعدد عرب واسلامی ممالک کے وزرائے خارجہ کی جانب سے جاری کردہ اس بیان کا بھرپور خیر مقدم کیا ہے، جس میں مقبوضہ مغربی کنارے میں غیر قانونی طور پر اسرائیلی”حاکمیت“مسلط کرنے اور فلسطینی عوام کی جبری بے دخلی سے متعلق قابض اسرائیلی حکومت کے فیصلوں اور اقدامات کو مسترد کیا گیا ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل عزت مآب شیخ ڈاکٹر محمد بن عبد الکریم العیسی نے قابض اسرائیلی افواج کی جانب سے تمام بین الاقوامی و انسانی قوانین اور روایات کی مسلسل تحقیر، مجرمانہ خلاف ورزیوں اور امن کی کوششوں کو سبوتاژ کرنے کے خطرناک نتائج سے ایک بار پھر خبردار کیا۔ انہوں نے اس ضمن میں وزرائے خارجہ کے بیان میں دی گئی اس تنبیہ کی تائید کی جس میں قابض حکومت کی مقبوضہ مغربی کنارے میں جاری توسیعی پالیسیوں اور غیر قانونی اقدامات کے تسلسل پر تشویش کا اظہار کیا گیا ہے، جو خطے میں تشدد اور تنازع کو ہوا دے رہے ہیں۔
ڈاکٹر العیسی نے عالمی برادری سے ایک بار پھر مطالبہ کیا کہ وہ قابض حکومت کی خلاف ورزیوں کو روکنے کے لیے اپنی قانونی اور اخلاقی ذمہ داریاں پوری کرے، اور سلامتی کونسل کی قراردادوں اور” نیویارک اعلامیہ“برائے دو ریاستی حل سمیت تمام بین الاقوامی فیصلوں کے نفاذ کے لیے سنجیدہ اور دوٹوک موقف اختیار کرے۔ انہوں نے اقوام متحدہ کی جنرل اسمبلی کی قراردادوں اور عالمی عدالتِ انصاف کی مشاورتی رائے کی روشنی میں فلسطینی عوام کے اپنے حقِ خودارادیت اور اپنی ریاست کے قیام کے غیر متزلزل تاریخی حق پر زور دیتے ہوئے کہا کہ یہی وہ واحد راستہ ہے جو خطے میں سلامتی اور استحکام کی ضمانت دینے والے منصفانہ، جامع اور دیرپا امن کی راہ ہموار کر سکتا ہے۔