رابطہ عالم اسلامی کی جانب سے مملکت سعودی عرب اور خطے کے دیگر ممالک پر مسلسل بزدلانہ ایرانی جارحیت کی شدید مذمت

رابطہ عالم اسلامی کی جانب سے مملکت سعودی عرب اور خطے کے دیگر ممالک پر مسلسل  بزدلانہ ایرانی جارحیت کی شدید مذمت
مکہ مکرمہ:
رابطہ عالم اسلامی نے مملکت سعودی عرب اور خطے کے دیگر ممالک پر مسلسل بزدلانہ ایرانی جارحیت کی سخت ترین الفاظ میں مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل عزت مآب شیخ ڈاکٹر محمد بن عبد الکریم العیسی نے پُرامن پڑوسی ممالک پر اس کھلی ایرانی جارحیت کی شدید مذمت کرتے ہوئے کہا کہ یہ کاروائی دہشت گردی اور زمین پر فساد کے مترادف ہے، جو تمام مذہبی اقدار اور بین الاقوامی و انسانی قوانین اور روایات کی صریح خلاف ورزی ہے۔ ڈاکٹر العیسی نے مزید کہا کہ یہ جارحیت دوطرفہ معاہدوں اور حسنِ جوار کے اصولوں کی نفی ہے، جس میں اس ماہِ مبارک کے دوران عام شہریوں اور سویلین تنصیبات کو دانستہ طور پر نشانہ بنا کر پُرامن شہریوں میں خوف و ہراس پھیلایا گیا ہے۔
ڈاکٹر العیسی نے رابطہ اور اس کی اکیڈمیز، ادارہ جات اور عالمی کونسلز کی جانب سے، اور رابطہ کی چھتری تلے موجود تمام مسلم اقوام کی طرف سے، مملکت سعودی عرب اور اس خطرناک ایرانی لاقانونیت سے متاثرہ دیگر عرب ممالک کے حکیمانہ طرزِ عمل کو سراہا۔ انہوں نے اپنی سرزمین اور شہریوں کے تحفظ کے لیے ان ممالک کی کوششوں، اور خطے میں امن و استحکام برقرار رکھنے اور اسے جنگ کے پھیلاؤ اور اس کے سنگین نتائج سے بچانے کے عزم کی تعریف کی۔