رابطہ عالم اسلامی کی جانب سے قابض حکومت میں متعین امریکی سفیر کے بیانات کی شدید مذمت

رابطہ عالم اسلامی کی جانب سے قابض حکومت میں متعین امریکی سفیر کے بیانات کی شدید مذمت

مکہ مکرمہ
رابطہ عالم اسلامی نے قابض اسرائیلی حکومت کے ہاں تعینات ریاست ہائے متحدہ امریکہ کے سفیر کے اُن بیانات کی سخت ترین الفاظ میں مذمت کی ہے، جن میں مشرقِ وسطیٰ کی سرزمین پر اسرائیلی توسیع سے متعلق گمراہ کن دعووں اور بے بنیاد و عبث خیالات کو ہوا دی گئی۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل عزت مآب شیخ ڈاکٹر محمد بن عبد الکریم العیسی نے ان جھوٹے اور غیر ذمہ دارانہ بیانات کی شدید مذمت کرتے ہوئے کہا کہ یہ کاروائی خطے کی سلامتی اور ریاستوں کی خودمختاری کے ساتھ ایک غیر معمولی کھلواڑ ہے، جو تمام بین الاقوامی قوانین و روایات کی صریح خلاف ورزی اور امریکی امن منصوبے کے واضح وعدوں کی نفی ہے۔
ڈاکٹر العیسی نے ایک بار پھر اس بات پر زور دیا کہ خطے میں مطلوبہ امن و استحکام کی واحد ضمانت بین الاقوامی قراردادوں اور فیصلوں کا نفاذ ہے، جن میں سلامتی کونسل کی قراردادیں اور اقوام متحدہ کی جنرل اسمبلی سے تائید شدہ دو ریاستی حل سے متعلق ”نیویارک اعلامیہ“ شامل ہیں۔ یہ فیصلے فلسطینی عوام کے اپنے حقِ خودارادیت اور اپنی آزاد ریاست کے قیام کے غیر متزلزل تاریخی حق کی توثیق کرتے ہیں۔ انہوں نے مزید کہا کہ ایسے ادنیٰ درجے کی سیاسی ذمہ داری سے عاری اور ناکام دلائل پر مبنی بیانات سے اس برحق مطالبے پر کوئی اثر نہیں پڑے گا۔