رابطہ عالم اسلامی کا امریکہ اور ایران کے مابین جنگ بندی کے معاہدے کا خیر مقدم

رابطہ عالم اسلامی کا امریکہ اور ایران کے مابین جنگ بندی کے معاہدے کا خیر مقدم

مکہ مکرمہ

رابطہ عالم اسلامی نے ریاست ہائے متحدہ امریکہ کے صدر جناب ڈونلڈ ٹرمپ اور اسلامی جمہوریہ پاکستان کے وزیراعظم جناب محمد شہباز شریف کی جانب سے امریکہ اور اسلامی جمہوریہ ایران کے مابین جنگ بندی کے معاہدے تک پہنچنے کے اعلان کا خیر مقدم کیا ہے۔
رابطہ کے جنرل سیکرٹریٹ سے جاری ایک بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن  عبد الکریم العیسی  نے رابطہ عالم اسلامی اور اس کی عالمی کونسلز، ادارہ جات اور اکیڈمیز کی جانب سے اسلامی جمہوریہ پاکستان کی مصالحتی کوششوں کو سراہتے ہوئے ان کی بھرپور حمایت کا اظہار کیا ہے۔ یہ کوششیں وزیراعظم جناب شہباز شریف اور چیف آف آرمی اسٹاف جنرل عاصم منیر کی قیادت میں انجام دی گئی ہیں اور تاحال جاری ہیں۔ عزت مآب نے امید ظاہر کی کہ یہ پیش رفت ایک جامع اور مستقل معاہدے کی صورت اختیار کرے گی، جو خطے میں امن و استحکام کو یقینی بنائے اور ان دہائیوں پر محیط سیاسی رویوں کا ازالہ کرے جن کا نتیجہ صرف تفرقہ بازی اور علاقائی عدم استحکام کی صورت میں نکلا تھا۔
عزت مآب نے ایران پر زور دیا کہ وہ اپنے عوام کے مفادات کو ترجیح دے اور انہیں ہر قسم کے خطرات اور ان کے اسباب سے محفوظ رکھے۔ نیز اس سیاسی شعور اور بصیرت کے ساتھ معاملات طے کرے جو ہمارے دینِ اسلام کی حقیقی تعلیمات کی عکاس ہے؛ وہ دین جس نے حکمت کی رہنمائی کی ہے اور جس کے تہذیبی منہج اور لغت میں ” سلام“ (امن) کو مرکزی حیثیت حاصل ہے؛ بجائے ان مہم جوئیوں کے جن کا حاصل مزید نقصانات اور اسلامی و عالمی برادری سے تنہائی کے سوا کچھ نہیں۔ خصوصاً مسلم اقوام ان مجرمانہ حملوں کو کبھی قبول نہیں کریں گی جو ایران نے اپنے پرامن پڑوسی ممالک کے خلاف کیے ہیں۔آپ نے مزید کہا کہ شہری تنصیبات کو نشانہ بنانا ایرانی حیلوں کے جھوٹ اور اس کے بدنیتی پر مبنی ارادوں کو بے نقاب کرتا ہے۔ ایران اس وقت ایک تاریخی موڑ پر ہے جہاں اسے اپنے عوام، استحکام اور مستقبل پر پڑنے والے سنگین اثرات کا ادراک کرنا ہوگا، اور ماضی کے ان واہموں سے نکلنا ہوگا جن کا انجام صرف تباہ کن نتائج کی صورت میں نکلتا ہے۔